كل عام وانتو بخير يا احبابي

كل عام وانتو بخــــير يا حبابي
يا حروف بيضا بصفحة كتابي
كل عام وانتي بخيــــر ضيعتنا
من الجبل للوديان للغابــــــــــــــي
هَي من زَمَنْ ودهور عادتنا
نعايد عَ بعض بروح وهّـــــابي
بعيد الميلاد ل فيه وحـــــدتنا
جاي بمحبة ولابــــــــــس تيــــابي
جايي على الارض الّي جابتنا
والعين منّي الدمع سكّابي
عَ سنين عـــم تمضى بغربتنا
وشوقي لخلاني وأصحــــــابي
عايد عَ ســـــــــــــــايح فيه عزتنا
وشامخ بطّلة حســـــــــن خلّابي
وبعين مريم صـــبّ دمعتنا
اسكب دموع العز بِعْبابي
ومن الشريفي شوف طلتنا
قوس القزح جيبو على حسابي
ومن الصليعه جيب نسمتنا
ومن عطرها عبّي انا جيابي
وعَالحرش شرّق عا مغارتنا
ونبّوعة القرير صبـــــــــــّابي
وارجع بسرعه وزور حارتنا
وفتش على المزراب والخابه
وتنور يا ما رغيف خبزتنا
قمّر وجو بنيران لهّابي
وعنقود نازل من سطيحتنا
وعرّيش ل عَالحيط نشّابي
وعصفور عشّو بزنزرختتنا
وصيّاد منو العين صيّابي
واهلي وخــــــــلّاني وجيرتنا
والمدرسة وطلاب وكتابي
وحلوين كانو متل اخوتنا
ع المقعد القاسي الخشّابي
واصحا ع ناقوسك كنيستنا
وترتيل يتــــــــــــــرنم بإعجــــابي
وعيّد على ورقات شجرتنا
وعَلّي تذكرني بصباح العيد
وعَلّي نسيني بخيرة اصحابي